قصة التقليد في امريكا
يصحى الرجل من النوم بعد ان قضى قصطا من الراحة بعد عناء و تعب العمل المظني الذي قام بة في الشركة التي يعمل فيها.
الزوج: يالله اليوم يا والي على كل والي يا ارحم الراحمين سهل لنا و فرج علينا ؟ قومي يا ام العيال اعملي لقمة فطور الله يرضى عليش! بنية قومي ؟ يالله انها تقوم من النوم ! معي عمل ضروري الله يرضى عليش اشتي سير معي عمل ظروري قومي لا قل لش!
تقوم الزوجة و عليها علامات التعب الشديد ليس لانها كانت ترضع الاولاد او او او لكن لأنها قضت الليل تشاهد الحلقات و تخزن القات.
الزوجة: اطلب الله ينفعك اصبحت تقومني من يالله اليوم ليش قدك مبدل و ين ساير اليوم؟
الزوج: انا معي عمل مهم لازم اقضية قبل العمل انا باروح المكتب حق الاشغال من شان شوف لي عمل جديد. احسن من عملي هذا. يعني فلوس اكثر و ساعات اكثر.
الزوجة: يالله ناهي كل بعقلي حلاوه. و الله ان مدري وش قد معك؟
الزوج: وش معي يا مره اطلبي الله ينفعش. او شاسير زوج؟ شي معش خبر ثاني؟
الزوجة: شف قلتها بنفسك! قد انا حاسة انك مخبي عليا حاجة؟
الزوج : و يش مخبي عليش الله يصيبش. الحين لا تغالطيني انا اشتي فطور.
الزوجة: فطور قال؟ زوجتك الجديد با تعمل فطور. و بعدين انا اشتي فلوس باسير عند صاحبتي اشتي قات و اشتي معسل. و حق العصير.
الزوج: طيب اعملي لي فطور و بعدين هي تحتل.
الزوجة: انتة عارف ايش اشتي منك ثاني ؟
الزوج: ايش تشتي مني؟
الزوجة: مع جارتنا كلب اشتي كلب مثل حقهم؟
الزوج: مستغربا! كلب و احنا ليش الكلب او يحرس القات؟ و بعدين قلي لي ما شي معي مصاريف الجهال و لا مصاريفش انتي؟ عادش تشتي كلب ؟ انتي ما تعرفي مصاريف الكلاب في هذه البلاد؟
الزوجة : اشتي كلب و الله ما اعمل لك لقمة و احده.
الزوج : ضابح .. خلاص ما عاد اشتي صبوحش و لا قهوتش.. انا باروح المطعم و كل هناك.
الزوجة: معانده... هاه معك حق الصبوح في المطعم لكن ما معك شي حق الكلب؟
الزوج: يا مره اذا تشتي كلب انا اتصل لاهل البلاد يدو لنا كلب من اليمن.. قدوه احسن من كلاب هانا و بعدين الكلب اليمني بايفهم عليش و يش تقولين له اما الكلب حق هانا عاده يشتي تعليم و يشتي و يشتي؟
الزوجة : مشتي كلب من حق اليمن ! كلة جرب و بعدين مش متعلم و الا يأكل واحد من العيال.
الزوج: اسمعي يا مره الله يصلحش اولا كلب من حق هانا يشتي له دكتور و علاج و يشتي طبق لحالة و يشتي لة مدرب و تأمين صحي و الى آخره لكن كلب من اليمن ما يشتي و لا حاجة كل ما في الامر معاملة الفيزه حقة.
الزوجة: مصره على رأيها انا اشتي كلب و الا و الله لا طلعك من البيت...و لم عليك الجيران.
الزوج: اسمعي يا بنت الناس اعملي لش عقل. من شان كلب با تطلعيني من البيت.. و الله انها قلت حيا.
و بعدين من المجنون ذي با يشتري لش كلب.
الزوجة : خلاص انا تعبت منك و من حياتك شف لك حل مع نفسك.
الزوج: و انا تعبت منش و من مشاكلش انا باترك لش البيت و اخرج..
يبدأ الاولاد في البكاء على ابيهم الذي يحبهم بشكل لا يطاق و يلبي كل طلباتهم و الاب يجهز حقيبة الفراق على امل ان تعقل الزوجة المجنونة بالحضاره الغربية .
هذا ما سنعرفة في الجزء الثاني ان شاء الله.
حقوق النقل و النشروالطبع محفوظة للكاتب توفيق حميدي
السبت 27 ديسمبر 2008 - 12:25
